ರಾಯಲ್ಟಿಯಲ್ಲಿ ಸೈನಾ, ಸಾನಿಯಾ ಹಿಂದಿಕ್ಕಿದ ಸಿಂಧು
ನವದೆಹಲಿ(ಸೆ.27): ಬೇಸ್ಲೈನ್ ಎಂಬ ಫಿಟ್ನೆಸ್ ಕಂಪನಿಯೊಂದಕ್ಕೆ ಮುಂದಿನ ಮೂರು ವರ್ಷಗಳ ಕಾಲ ರಾಯಭಾರಿಯಾಗಿ ಆಯ್ಕೆಯಾಗಿರುವ ರಿಯೊ ಒಲಿಂಪಿಕ್ಸ್ ಬೆಳ್ಳಿ ಪದಕ ವಿಜೇತೆ ಪಿ.ವಿ. ಸಿಂಧು, ಗೌರವ ಧನದ ವಿಚಾರದಲ್ಲಿ ಸೈನಾ ನೆಹ್ವಾಲ್ ಮತ್ತು ಸಾನಿಯಾ ಮಿರ್ಜಾ ಅವರನ್ನೂ ಹಿಂದಿಕ್ಕಿದ್ದಾರೆ. ಗೌರವ ಧನದ ರೂಪದಲ್ಲಿ ರೂ.50 ಕೋಟಿ ಮೊತ್ತವನ್ನು ಪಡೆದಿದ್ದಾರೆ ಎಂದು ‘ಫಸ್ಟ್ ಪೋಸ್ಟ್’ ವರದಿ ಮಾಡಿದೆ. ಈ ಮೂಲಕ ಅವರು, ದೇಶದಲ್ಲಿ ಕ್ರಿಕೆಟೇತರ ಕ್ರೀಡಾಳುಗಳಿಗೂ ಶುಕ್ರದೆಸೆ ಆರಂಭವಾಗಿರುವುದನ್ನು ಸಾಬೀತುಪಡಿಸಿದ್ದಾರೆಂದು ವರದಿಯಲ್ಲಿ ಹೇಳಲಾಗಿದೆ.
ಮೂಲಗಳ ಪ್ರಕಾರ, ಸಿಂಧು ಅವರನ್ನು ರಾಯಭಾರಿಯನ್ನಾಗಿಸಲು ಸುಮಾರು 16 ಕಂಪನಿಗಳು ಪೈಪೋಟಿ ನಡೆಸಿವೆ. ಇವುಗಳಲ್ಲಿ ಸಿಂಧು ಅವರು ಖುದ್ದಾಗಿ 9 ಕಂಪನಿಗಳ ಆಫರ್ಗಳನ್ನು ಮಾತ್ರ ಪರಿಗಣನೆಗೆ ತೆಗೆದುಕೊಂಡಿದ್ದು ಇನ್ನೂ ಯಾವುದಕ್ಕೂ ಒಪ್ಪಿಗೆ ನೀಡಿಲ್ಲ ಎಂದು ಹೇಳಲಾಗಿದೆ.
ಸೈನಾ, ಸಾನಿಯಾ ಹಿಂದಕ್ಕೆ: ಈ ಹಿಂದೆ, 2015ರ ಫೋರ್ಬ್ಸ್ ಸೆಲೆಬ್ ಪಟ್ಟಿಯ ಪ್ರಕಾರ, ಸೈನಾ ಅವರ ಗರಿಷ್ಠ ರಾಯಲ್ಟಿಮೊತ್ತ ವಾರ್ಷಿಕ ಸರಾಸರಿ ಲೆಕ್ಕದಲ್ಲಿ ರೂ. 16.99 ಕೋಟಿ ಇದ್ದರೆ, ಸಾನಿಯಾ ಅವರ ಮೊತ್ತ ರೂ. 13.25 ಕೋಟಿಯಷ್ಟಿತ್ತು. ಎರಡು ವರ್ಷಗಳ ಹಿಂದೆ ಸೈನಾ ನೆಹ್ವಾಲ್ ಅವರು, ಐಒಎಸ್ ಸ್ಪೋರ್ಟ್ಸ್ ಹಾಗೂ ಎಂಟರ್ಟೈನ್ಮೆಂಟ್ ಸಂಸ್ಥೆಯ ಎರಡು ವರ್ಷಗಳ ರಾಯಭಾರತ್ವಕ್ಕಾಗಿ ಸಹಿ ಮಾಡಿದಾಗ ರೂ. 25 ಕೋಟಿ ಪಡೆದಿದ್ದರು. ಆ ಮೂಲಕ, ಅದು ಕ್ರಿಕೆಟ್ ಹೊರತಾದ ಆಟಗಾರರೊಬ್ಬರು ಗಳಿಸಿದ ಅತಿ ದೊಡ್ಡ ಗೌರವ ಧನ ಹೆಗ್ಗಳಿಕೆಗೆ ಪಾತ್ರರಾಗಿದ್ದರು. ಇದೀಗ, ಬೇಸ್ಲೈನ್ ಸಂಸ್ಥೆಯೊಂದಿಗಿನ ಒಪ್ಪಂದ ಮೂಲಕ ಆ ದಾಖಲೆಯನ್ನು ಸಿಂಧು ಮುರಿದಿದ್ದಾರೆ.